ՀԱՅՐԱՊԵՏԱԿԱՆ ՈՒՂԵՐՁ

Ն.Ս.Օ.Տ.Տ. ԳԱՐԵԳԻՆ ԵՐԿՐՈՐԴ ԱՄԵՆԱՅՆ ՀԱՅՈՑ ԿԱԹՈՂԻԿՈՍԻ ՈՒՂԵՐՁԸ ՀԱՅՈՑ ՑԵՂԱՍՊԱՆՈՒԹԵԱՆ ՍՈՒՐԲ ՆԱՀԱՏԱԿՆԵՐԻ ՅԻՇԱՏԱԿԻ ՕՐՈՒԱՅ ԱՌԻԹՈՎ

(24 ապրիլի, 2022 թ.)

Սիրելի ժողովուրդ հայոց ի հայրենիս եւ ի սփիւռս,

Այսօր, համախմբուելով մեր սրբազան տաճարներում, մեր քայլերն ուղղելով դէպի Ծիծեռնակաբերդի բարձունք, դէպի աշխարհասփիւռ համայնքներում կանգնեցուած խաչքարեր ու յուշակոթողներ, մեր խոնարհումն ենք բերում Հայոց ցեղասպանութեան սուրբ նահատակներին: Նրանք զոհ գնացին օսմանեան իշխանութիւնների ցեղասպան ծրագրին իրենց հայրենի բնակավայրերում եւ գաղթի ճանապարհներին` մարտիրոսութեամբ վկայելով հաւատարմութիւնը նախնեաց հաւատին, դաւանած արժէքներին եւ ազատ ու անկախ կեանքի տեսիլքին:

Եղեռնահար ու հայրենազրկուած մեր ժողովուրդը, առ Աստուած ապաւինութեամբ, կամք եւ ուժ գտաւ` վերընձիւղելու իր անկախ պետականութիւնը պատմական հայրենիքի արեւելեան փոքր հատուածում եւ շէն ու բարօր կեանք կերտելու իր  զաւակներին ապաստան տուած աշխարհի տարբեր երկրներում:

Ցեղասպանութիւնից մէկ դար անց` արցախեան 44-օրեայ պատերազմից յետոյ, մեր երկրի առջեւ ծառացած մարտահրաւէրները, հայրենիքի շուրջ ծաւալուող աշխարհաքաղաքական գործընթացները, Ադրբեջանի ագրեսիւ ու հայատեաց քաղաքականութիւնը փաստում են, որ վերացուած չեն հայրենաբնակ մեր ժողովրդի, ի մասնաւորի` Արցախի հայորդիների ապահով ու անվտանգ կեանքի սպառնալիքները: Մեր սուրբ նահատակների յիշատակի առջեւ նուիրական մեր պարտքն է համախմբուել եւ պաշտպանել արցախահայ մեր ժողովրդի ազատ ու անկախ ապրելու իրաւունքը, Հայաստան ու Արցախ մեր աշխարհի անվտանգութիւնը, կանխել Ադրբեջանի վերահսկողութեան տակ անցած տարածքներում հայկական հոգեւոր-մշակութային ժառանգութեան բարբարոսաբար ոչնչացումը, որ չկրկնուի Նախիջեւանում իրագործուած մշակութային եղեռնը: Այլեւ նուիրական մեր պարտքն է հետամուտ լինել Հայոց ցեղասպանութեան համընդհանուր ճանաչմանն ու դատապարտմանը, որ երբեք նման ոճրագործութիւն տեղ չգտնի մարդկութեան կեանքում, եւ արդարութիւն իրականացուի ցեղասպանութեան զոհերի եւ ցեղասպանութիւն վերապրած բոլոր ժողովուրդների նկատմամբ: Պետական եւ ազգային-եկեղեցական կառոյցների, ամէնքիս յանձնառութիւնը պիտի շարունակի մնալ միջազգային հարթակներում բարձրաձայնումը Արցախի մեր ժողովրդի ոտնահարուող իրաւունքների եւ հայոց արդար դատի` ի խնդիր ազգիս արժանապատիւ եւ լուսաւոր կեանքի ու գալիքի:

Մեր աղօթքն է, որ յարուցեալ Տէրը, մեր սուրբ նահատակների բարեխօսութեամբ, խաղաղութիւն պարգեւի ողջ աշխարհին, ապահովութիւն ու բարօրութիւն` Հայաստան եւ Արցախ մեր երկրին եւ աշխարհասփիւռ մեր ժողովրդին: Թող Բարձրեալի ողորմութիւնը, օրհնութիւնն ու խնամքը հովանի լինեն ամէնքիս, այսօր եւ միշտ. ամէն:

Մայր Աթոռ Սուրբ Էջմիածին
Տեղեկատվական համակարգ
հեռ.: (374 10) 517 172,  hեռատիպ` (374 10) 517 301
Էլ-փոստ` mothersee@etchmiadzin.am
կայք` www.armenianchurch.org